Перейти к содержимому

Нормативные документы ШНҚ 2.07.01-23

ШНҚ 2.07.01-23, 2-банд

2-боб. Атамалар ва таърифлар

2

Ушбу ШНҚда қуйидаги атамалар ва уларнинг таърифлари қўлланилган:

автотураргоҳ — транспорт воситаларини доимий, вақтинча ёки мавсумий сақлаш (туриши) учун мўлжалланган алоҳида ёки қўшиб қурилган, ерусти, ерости ёки бирлашган бино, иншоот (бино ёки иншоот қисми) ёхуд махсус очиқ майдон;

агломерация — аҳоли пунктларининг ихчам ҳудудий гуруҳи бўлиб, унинг асосий кўриниши шаҳарлар, ажралиб турадиган жойлар бўлиб, интенсив саноат, транспорт ва маданий алоқаларга эга бўлган кўп қатламли кўп компонентли динамик тизимда бирлаштирилган;

аҳоли пункти — ҳуқуқий мақом, ном ва чегара билан белгиланган Ўзбекистон Республикаси маъмурий-ҳудудий бирлиги (шаҳар, шаҳарча, қишлоқ, овул);

аҳоли пунктлариаро ҳудудлар — икки ва ундан ортиқ аҳоли пункти оралиғидаги аҳоли пунктлари чегараларидан ташқаридаги ҳудудлар;

баланд қаватли турар жой бинолари — 25 ва ундан кўп қаватли турар жой бинолари;

бириктирилган (блокланган) уй — икки ёки ундан ортиқ хонадондан иборат бўлган, ҳар бири ер участкасига кириш ва алоҳида муҳандислик тизимлари билан таъминланган турар жой биноси;

аҳоли пунктининг бош режаси — аҳоли пунктини ҳудудий ривожлантиришнинг асосий йўналишларини ҳамда фуқароларнинг қулай ҳаёт фаолияти муҳитини комплекс шакллантириш шарт-шароитларини белгилайдиган шаҳарсозлик ҳужжати;

даҳа (квартал) — энг яқин кўчалар билан чегараланган ҳудуд, энг кичик шаҳарсозлик элементи;

ер участкаси — ер фондининг қайд этилган чегарага, майдонга, жойлашиш манзилига, ҳуқуқий режимга ҳамда давлат ер кадастрида акс эттириладиган бошқа хусусиятларига эга бўлган қисми;

зоналаштириш — ҳудудни ривожлантиришни шаҳарсозлик жиҳатидан режалаштириш чоғида шаҳарсозликнинг фойдаланиш турларини ҳамда бу турлардан фойдаланишга доир чекловларни белгилаган ҳолда, ҳудуднинг функционал мақсадга кўра бўлиниши;

кам қаватли турар жой бинолари — мансарда қаватини ҳам қўшиб ҳисоблаганда 1 — 3 қаватли турар жой бинолари;

кўп қаватли турар жой бинолари — 10 — 16 қаватли турар жой бинолари;

кўп квартирали уй-жойлар — кўп квартирали уйга туташ ер участкасига ёхуд бундай уйдаги умумий фойдаланиладиган жойларга мустақил чиқиш йўлакларига эга бўлган икки ва ундан ортиқ квартиралар мажмуи;

магистраль кўча — шаҳарнинг асосий тармоқ йўли. Улар умумшаҳар аҳамиятига эга бўлган (аҳоли яшовчи, саноат туманлари ва жамоат марказлари ўртасидаги алоқа, шаҳар ташқарисидаги автомобиль йўлларига чиқиш) ва туман аҳамиятидаги магистраль кўчалар (туман чегарасидаги ва умумшаҳар аҳамиятига эга бўлган магистраль кўчалар билан транспорт алоқалари)га бўлинади.

муҳофаза этиладиган табиий ҳудудлар — ер ва/ёки сув кенгликлари (акваториялар)нинг устувор экологик, илмий, маданий, эстетик, рекреация ва санитария-соғломлаштириш аҳамиятига молик бўлган, хўжалик мақсадидаги доимий ёки вақтинча фойдаланишдан тўлиқ ёки қисман чиқарилган участкалари;

реконструкция қилиш — бинолардан фойдаланиш шароитларини ўзгартириш, уларнинг жисмоний эскириши туфайли юзага келган йўқотишлар ўрнини тўлдириш, бинолардан фойдаланишнинг янги мақсадларига эришиш учун асосий техник-иқтисодий кўрсаткичларни (юкламаларни, хоналарнинг режалаштирилишини, бинонинг қурилиш ҳажмини ва умумий майдонини, муҳандислик жиҳатдан жиҳозланишини) ўзгартириш билан боғлиқ қурилиш ишлари ва ташкилий-техник тадбирлар;

санитария-муҳофаза зоналари — атмосферани ифлослантирувчи манбалар бўлган ишлаб чиқариш ва бошқа турдаги объектлар учун санитария-муҳофазаси зонаси бўлиб, унинг кенглиги жойлашган ишлаб чиқаришнинг синфига қараб белгиланади;

стилобат — бинонинг поғонали ярим ертўласининг юқори қисми ёки бир нечта биноларни боғлайдиган умумий ярим ертўла. Меъморчиликда стилобатлар кўпинча тижорат объектларини жойлаштириш учун фойдаланилади;

ташқи транспорт — автомобиль, дарё, темир йўл ва ҳаво транспортларини ўз ичига олувчи тизим тушунчаси;

турар жой мавзеси — магистрал кўчаларга туташ, турар жой бинолари ва маиший хизмат кўрсатиш корхоналари мажмуаси бўлган, шаҳар турар жой қурилишининг бирламчи бирлиги;

умумий фойдаланишдаги ҳудуд (ер)лар — аҳолининг эркин ҳаракатланиши (фойдаланиши) учун мўлжалланган ва давлат мулки сифатида шаҳар, туман давлат ҳокимияти органларининг бевосита тасарруфидаги ерлар;

функционал зоналар — шаҳарсозлик ҳужжатларида амалга ошириладиган қурилиш параметрлари билан бирга ҳудуддан фойдаланиш мақсадлари акс эттирилган ва чегаралари белгиланган ҳудудлар. Функционал зоналар ҳудудда рухсат этилган шаҳарсозлик фаолияти турлари (қурилиши, реконструкция, реновация ва бошқалар) ва чегаравий (максимал ёки минимал) ўлчамларига кўра ҳудудий зоналар ва кичик ҳудудий зоналарга бўлинади;

юқори қаватли турар жой бинолари — 17 — 24 қаватли турар жой бинолари;

якка тартибдаги уй-жой — якка тартибда уй-жой қуриш ва томорқа хўжалигини юритиш учун мўлжалланган бир ер участкасида жойлашган бир ёки бир нечта турар жой бинолари ва хўжалик қурилмалари мажмуи;

ўрта қаватли турар жой бинолари — мансарда қаватини ҳам қўшиб ҳисоблаганда 4 — 9 қаватли турар жой бинолари;

қайта қуриш (қайта тиклаш) — объектдаги бино ва иншоотларни тўлиқ ёки қисман бузиб ташлаб, уларнинг ихтисослашишини ўзгартирган ёки ўзгартирмаган ҳолда янгиларини қуриш;

қизил чизиқлар — шаҳарсозлик ҳужжатларида белгиланадиган, мавзеларнинг, кичик даҳаларнинг ва режалаштириш тузилмаси бошқа элементларининг ҳудудларини аҳоли пунктларининг кўчаларидан, тор кўчаларидан ва майдонларидан ажратиб турувчи чегаралар;

қурилиш ҳудуди — шаҳарсозлик ҳужжатларида белгиланган чегаралар ва функционал мақсадга эга бўлган, бино ва иншоотлар қурилган ёки қурилиши режалаштирилган ҳудуд;

қурилишни тартибга солиш чизиғи — шаҳарсозлик ҳужжатлари билан белгиланадиган, бино ва иншоотларни жойлаштиришда қизил чизиқлар ёки ер участкасининг чегараларидан чекиниш чегаралари.

Официальный источник: lex.uz. Редакция: 04.11.2026. Латиница — автоматическая транслитерация, официальный текст на кириллице.

Мы принимаем

UzcardHumoVisaMastercard

Оплата проходит на защищённой странице платёжной системы и подтверждается по 3D Secure. Данные карты на нашем сайте не хранятся.