Мазкур ШНҚда қуйидаги атамалар ва уларнинг таърифлари қўлланилган:
атроф-муҳитга таъсир кўрсатилиши тўғрисидаги баёнот — атроф-муҳитга таъсирни баҳолаш жараёнининг иккинчи босқичи ҳисобланади, бунда атроф-муҳитга таъсирни баҳолаш жараёнининг биринчи босқичи давлат экологик экспертизасидан ўтказилиши натижаларига кўра қўшимча тадқиқотлар, махсус таҳлиллар ўтказиш, атроф-муҳитга ва фуқаролар соғлиғига қўшимча равишда салбий таъсирнинг олдини олишга қаратилган чора-тадбирларни ишлаб чиқишда ва бошқа ҳолатларда зарурлиги аниқланган бўлса, ишлаб чиқиладиган материаллар;
архитектуравий-бадиий ечим — бинонинг фазовий ва режавий ташкил этилиши ҳамда унинг визуал ва функционал тавсифлари;
буюртмачи — объектларни қуриш, реконструкция қилиш, таъмирлаш ва бузишнинг амалга оширилишини таъминловчи, шунингдек шу мақсадларда лойиҳа-қидирув, экспертлик, қурилиш-монтаж ва назорат ишларини бажариш учун тегишли ташкилотлар билан шартномалар тузувчи жисмоний ёки юридик шахс;
бош лойиҳачи — лойиҳанинг алоҳида қисмларини бажариш учун субпудратчилар (ҳамижрочилар) билан шартномалар тузган ҳолда уларни жалб қилиб, лойиҳа-қидирув ишларини тўлиқ ҳажмда бажариш учун буюртмачи билан шартнома тузган лойиҳа ташкилоти;
бино ва иншоотларни модернизация қилиш — бинонинг мавжуд ўлчамдаги фойдаланиш кўрсаткичларини замонавий талабларга мувофиқлаштиришга қаратилган қурилиш-монтаж ишлари мажмуаси, жумладан бинолар, секциялар ва квартираларнинг режалаштириш тузилмасини ўзгартириш, биноларни етишмаётган турдаги муҳандислик ускуналари билан жиҳозлаш ҳамда уларни замонавий технологияларга мувофиқ бўлган тизимлар ва алоҳида конструкциялар билан алмаштириш;
визуал текширув — таянч конструкциялардаги, қопламалар ва деворлардаги ёриқлар ҳамда шикастланишларни аниқлаш учун бино ва иншоотларнинг техник ҳолатини кўздан кечириш;
жорий таъмирлаш — бинонинг фойдаланиш кўрсаткичларини сақлаб туриш бўйича таъмирлаш ишлари мажмуи;
ишчи лойиҳа — энг кўп қиймат акс этган асосий техник-иқтисодий кўрсаткичлар ва ишчи ҳужжатлар бўлган ҳамда ишчи чизмалардан ташкил топган лойиҳа ҳужжати;
ишчи ҳужжатлар — алоҳида бино ва иншоотлар ҳамда иш турлари учун ишчи чизмалар жамланмасидан иборат лойиҳа ҳужжати;
инструментал-техник текширув — махсус кузатув, ўлчов ва назорат воситаларидан фойдаланган ҳолда бинолар ҳамда иншоотларнинг техник ҳолатини текшириш;
лойиҳалаштириш топшириғи — қуриладиган, реконструкция қилинадиган ҳамда мукаммал ва жорий таъмирланадиган объектнинг лойиҳа ҳужжатларини ишлаб чиқишдан олдин техник қоидалар ва талабларни ҳисобга олган ҳолда, буюртмачининг лойиҳа ҳужжатларига бўлган умумий талаби;
лойиҳа ҳужжати — ҳажмий-режали, амалий ва техникавий ечимларни, биноларни, иншоотларни ва уларнинг мажмуаларини қуриш, реконструкция қилиш, мукаммал таъмирлаш ҳамда жорий таъмирлашнинг, шунингдек ободонлаштириш ишларининг қийматини белгиловчи лойиҳа ҳужжати;
мукаммал таъмирлаш — бинонинг ишончлилигини ва унда қулай шароитларни таъминлашга қаратилган фойдаланиш кўрсаткичларини яхшилаган ҳолда қайта тиклаш бўйича қурилиш-таъмирлаш ишлари мажмуи;
муҳандислик-техник қидирувлар — ҳудуд ва ер участкаларидан улар доирасида рационал ва хавфсиз фойдаланиш, ҳудудни режалаштириш, ҳудудда меъморий-қурилиш ишларини режалаштириш ва лойиҳалаш учун керакли бўлган материалларни асослаб бериш учун тегишли маълумотларни тайёрлаш мақсадида техноген таъсирнинг табиий шароитлари ҳамда факторларини ўрганиш;
муаллифлик назорати — объектларда қурилиш — монтаж ишларининг шаҳарсозлик ҳужжатларига мувофиқлигига доир устидан шаҳарсозлик ҳужжатини ишлаб чиққан лойиҳа ташкилоти томонидан амалга ошириладиган назорат;
совуқ кўприкчалар — бинонинг тўсувчи конструкциясининг паст термик қаршиликка эга бўлган қисми (деворларнинг чоклари (туташган жойлари), бетонли элементнинг охири (бурчаги). Бу конструкциялар ёки конструктив элемент қисмларининг орасидаги чок бўлиб, у анча юқори иссиқлик ўтказувчи материаллардан ташкил топиши мумин. Бундай жойлар тўсиқларнинг бошқа қисмларига нисбатан кучлироқ совийди ва конденсат ҳосил бўлишининг асосий сабабларидан бири ҳисобланади;
реконструкция қилиш — асосий техник-иқтисодий кўрсаткичларни (юкламаларни, хоналарнинг режалаштирилишини, бинонинг қурилиш ҳажмини ва умумий майдонини, муҳандислик жиҳатдан жиҳозланишини) ўзгартириш билан боғлиқ қурилиш ишлари ва ташкилий-техник тадбирлар мажмуи;
техник-иқтисодий асослар ёки техник-иқтисодий ҳисоб-китоб (ТИА/ТИҲК) — лойиҳанинг умуман энг кўп миқдордаги қийматини ва молиялаштириш эҳтиёжи ҳажмини кўриб чиқилган молиялаштиришнинг дастлабки шартларини ҳисобга олган ҳолда белгилаб берувчи муқобил вариантларни ўрганиш асосида лойиҳани амалга оширишнинг энг самарали техник-технологик ва ташкилий ечимини танлашни асослаб берувчи лойиҳаолди ҳужжатлар;
шаҳарсозлик фаолияти — давлат органларининг, фуқаролар ўзини ўзи бошқариш органларининг, юридик ва жисмоний шахсларнинг ҳудудларни ва аҳоли пунктларини ривожлантиришни шаҳарсозлик жиҳатидан режалаштириш, ер участкаларидан фойдаланиш турларини белгилаш, қурилиш материаллари ва буюмларини ишлаб чиқариш, биноларни, иншоотларни ҳамда уларнинг мажмуаларини шахс, жамият ва давлат манфаатларини, шунингдек мазкур ҳудудлар ҳамда аҳоли пунктларининг миллий, тарихий-маданий, экологик, табиий ўзига хос хусусиятларини инобатга олган ҳолда лойиҳалаштириш, қуриш ва реконструкция қилиш соҳасидаги фаолияти;
қурилишни ташкил этиш лойиҳаси — лойиҳанинг таркибий қисми бўлиб, унда қурилишнинг умумий давомийлиги ва оралиқ муддатлари, капитал маблағлар ва қурилиш-монтаж ишлари ҳажмларининг тақсимланиши, моддий-техник ресурслар ва уларни қоплаш манбалари, қурилиш-монтаж ишларини бажаришнинг асосий усуллари ва объект қурилишини бошқариш тузилмаси белгиланади.
Official source: lex.uz. Text as of: 29.04.2024. Latin script is an automatic transliteration; the official text is in Cyrillic.